Ұшақтың құлау себебін тек тұманнан іздейміз бе?
Кеше сағат 13:00 шамасында Алматы қаласының әуежайына шамамен бес шақырым жетпей, Алматы облысына қарасты Іле ауданының Қызыл ту елді мекеніне жақын жерде «Көкшетау-Алматы» бағытында қатынайтын жолаушылар ұшағы апатқа ұшырады.
«SCAT» әуе компаниясы» АҚ-ның №760 авиарейсін орындаушы «Challenger-200» әуе кемесінің бортында 5 экипаж мүшесі және 15 жолаушы болған. «Челленджер» сөзі үміткер деген мағына береді. Ұшақ ішіндегілерден аман қалғандар жоқ. Апат салдары әлі нақтыланған жоқ. Дегенмен ауа райының қолайсыздығы, дәлірек айтқанда, қалың тұман себеп болуы әбден мүмкін. Себебі Көкшетау-Алматы бағытымен ұшып шыққан ұшақ Алматы әуежайына қонар тұста радардан жоғалып, байланыс үзілген. Алғашқы жолы әуежайға жеткен ұшақ қонуға рұқсат ала алмайды. Екінші қайтара мүмкіндік жасамақ болған ұшақ тұманда адасып кеткен.
Оқиға орнына оннан астам өрт сөндіру көліктері, отызға жуық жедел жәрдем қызметі, жүзден астам төтенше жағдайлар қызметкерлері, сондай-ақ Алматы және Алматы облысынан бес жүзге жуық құқық қорғау органдарының қызметкерлері жұмылдырылды. Ұшақтағы барлық жолаушылар қаза тапты. Мәйіттердің барлығының дерлік дене мүшесі бөлшектеніп кеткен. Ұшақ Қызыл ту ауылының маңындағы белгісіз біреуге қарасты жекеменшік шаруашылық жеріне түскен. Бірнеше гектарды құрайтын жер бетон қоршауға алынған.
Бас көлік прокуратурасы аталған апатты дерек бойынша ҚР ҚК 295-бабының 3-бөлігімен шұғыл түрде қылмыстық іс қозғап, аталған іс бойынша жұмысын бастап кетті.
Мемлекет басшысы Нұрсұлтан Назарбаев Алматы облысының Қызылту кенті маңында жолаушылар ұшағының апатқа ұшырауы салдарынан қаза болғандардың туған-туыстарына көңіл айтты.
«Алматы облысының Қызыл ту кенті маңында адам құрбандығына душар еткен «СКАТ» әуе компаниясы жолаушылар ұшағының апатқа ұшырағаны туралы қаралы хабарды күйзеле отырып қабылдадым.
Қазақстан халқының және жеке өзімнің атымнан қаза болғандардың туған-туыстарына қайғырып көңіл айтамын.
Мен тиісті мемлекеттік органдарға ұшақтың апатқа ұшырауының себептерін анықтап, қайтыс болғандардың отбасыларына қажетті көмек көрсетуді тапсырдым», – деді Мемлекет басшысы Нұрсұлтан Назарбаев.
Түстен кейін ҚР Премьер-министрі Серік Ахметов «Алматы қаласының әуежайы маңында CRJ – 200 LR ұшағының құлауы салдарынан орын алған қайғылы оқиғаның себебін тексеру жөніндегі үкіметтік комиссия құру туралы» ҚР Үкіметінің қаулысына қол қойды. Бұл комиссияға Премьер-министрдің бірінші орынбасары – өңірлік даму министрі Бақытжан Сағынтаев жетекшілік етеді. Оның құрамына төтенше жағдайлар министрі Владимир Божко, көлік және коммуникациялар министрі Асқар Жұмағалиев, Бас прокуратура, Бас көлік прокуратура және басқа мемлекеттік органдардың өкілдері кірді.
«Скат» әуе компаниясы Алматы маңында апатқа ұшыраған ұшақта қаза тапқандардың тізімін жариялады.
Экипаж мүшелері:
Евдокимов Владимир – экипаж командирі
Шарапов Александр – 2-ші ұшқыш
Бабаян Слава – 3-ші ұшқыш
Кривоносова Ирина – борт серігі
Асфандиярова Дина – борт серігі
Жолаушылар:
Ғалымжан Дүйсенов
Дүйсен Жүзбаев
Асқар Құсайынов
Николай Лотков
Қайсар Малғаждаров
Акрам Низамов
Әбілжан Омаров
Марат Оразбаев
Индира Рақымбек
Александр Сериков
Арсен Шутиков
Асқар Ескендіров
Иван Жаворонков
Вейст Владимир
Рубас Александр
Бақытжан Р.М (бала)
Алматы әкімдігі әуе апатында қаза болған алматылықтарды жерлеуді ұйымдастыруда олардың туған-туыстарына көмек береді. Бұл туралы қала әкімінің баспасөз қызметі мәлім етті.
Сәкен КӨКЕНОВ
Алаш айнасы
Лебіз қалдыру
